Ólafur Snævar Ögmundsson, 79 ára gamall maður, og Auðunn sonur hans, sem notast við hjólastól vegna hreyfihömlunar, voru í gær bornir út úr leiguhúsnæði Ölmu leigufélags við Hátún. Alma framkvæmdi útburðinn á félögunum með aðstoð sýslumanns og lögreglu.
Fréttin.is greindi frá þessu í gær og tók atburðinn upp á tvö myndskeið sem finna má neðst í fréttinni. Í fréttinni segir:
„Málavextir eru þeir að Ólafur Snævar Ögmundsson leigutaki fékk íbúðina á leigu fyrir um þremur árum síðan. Hann hafði skellt sér í heimsókn til sonar síns sem þá bjó á Spáni, en veiktist svo harkalega í ferðinni, sem varð til þess að hann varð að leggjast inn á spítala í um þrjár vikur og þurfti einnig að greiða sjúkrahúskostnað á Spáni.
Vegna veikindanna náði Ólafur ekki að greiða leigu í tvo mánuði og fékk því innheimtubréf. Ólafur leitaði þá til umboðsmanns skuldara sem gekk í málið fyrir hann, og hafði umboðsmaðurinn í kjölfarið samband við Alma leigufélag, og tjáði þeim að skuldin yrði greidd að fullu.“
Ólafur segir að Alma hafi fengið loforð frá Umboðsmanni skuldara um að skuldin yrði greidd en samt hafi Alma ákveðið að krefjast útburðar á feðgunum. Rétt er þó að taka fram að ráðgjöf Umboðsmanns skuldara felur ekki í sér lánveitingu til greiðslu skulda, eins og kemur fram á heimasíðu embættisins.
DV ræddi málið stuttlega við Ólaf í dag og staðfesti hann frásögn Fréttarinnar af málinu og sagði hana vera rétta í einu og öllu. Hann skýrði jafnframt út fyrir DV að ekki væri um að ræða vangoldna leigu fyrir síðustu tvo mánuði heldur hefði skuldin komið til á eldra tímabili, eftir að hann veiktist hastarlega af Covid í ferð til Spánar. „Ég lá á spítala í þrjár vikur, ég ruglaðist því hugurinn var ansi þokukenndur,“ segir Ólafur í spjalli við DV og upplýsir jafnframt að hann hafi á sínum tíma greitt 200 þúsund króna tryggingu til leigufélagsins.
Engin lausn er í sjónmáli á vanda feðganna. „Ég talaði við félagsþjónustuna en það er ekkert laust og margra mánaða bið,“ segir Ólafur en útburðaraðilar í gær bentu honum á gistiskýlin. Hann segist ekki koma til greina að búa þar. Tekið skal fram að hvorki Ólafur né sonur hans eru í óreglu og Ólafur hefur ekki bragðað áfengi áratugum saman.
„Ég fann hótelherbergi í Reykjanesbæ þannig að við höfum þak yfir höfuð fram á morgun. Þetta kostaði mig 50 þúsund krónur,“ segir Ólafur. Aðspurður segist hann ekki hafa ráð á slíkri gistingu nema í örstuttan tíma. „Þetta endist ekki lengi svona,“ segir hann.
