Óttar Guðmundsson geðlæknir hefur litla trú á lækningamætti hugvíkkandi efna sem núna eru svo mikið í deiglunni. Í Bakþönkum sínum í Fréttablaðinu minnir Óttar á að allt fer í hringi og rifjar upp tíðaranda frá sjöunda áratugnum, þegar hugvíkkandi efni komu á sjónarsviðið:

„Á unglingsárum mínum á sjöunda áratugnum varð hippahreyfingin mjög áberandi. Menn gagnrýndu ríkjandi þjóðfélagskerfi og prédik­uðu nýjan lífsstíl. Tim Leary og fleiri gúrúar boðuðu fagnaðarerindi skynörvandi og hugvíkkandi efna til að losa um gamlar hömlur og kreddur. Þessar kenningar náðu flugi en margir efuðust og hugbreytandi efnin voru smám saman bönnuð. Allt fer í hringi og nú hafa ofskynjanaefni gengið í endurnýjun lífdaga sem töfralausn við öllum mögulegum geðkvillum.“

Margir vitna um lækningamátt hugvíkkandi efna en Óttar segir að engar rannsóknir liggi fyrir um að þau séu áhrifaríkari en önnur meðferðarúrræði. Efnin séu engan veginn fullrannsökuð og Óttar telur að hér sé tískubylgja á ferðinni, knúin lýðskrumi:

„Geðlæknar vara við auglýsingamennsku og popúlisma í kringum þessi efni þar sem þau séu á engan hátt fullrannsökuð. Margir gamlir fíklar hafa barist fyrir notkun hugbreytandi lyfja. Neysla ofskynjunarefna í lækningaskyni hljómar mun betur en hversdagsleg misnotkun. Enn og aftur er í tísku að kafa í sálardjúpin og finna sjálfan sig og tala í innihaldslausum frösum.“

Óttar segir að það sé í tísku að gera lítið úr hefðbundnum lækningum. Eins og komið hefur fram liggur núna fyrir Alþingi þingsályktunartillaga þess efnis að Ísland verði leiðandi í rannsóknum á hugvíkkandi efnum. „Þessi tillaga ber vott um forræðishyggju og æpandi vanþekkingu á eðli vísindarannsókna,“ segir Óttar og telur augljóst að flutningsmenn tillögunnar vilji vera hipp og kúl og boða nýtt fagnaðarerindi.

Óttar segir ennfremur:

„Gamlir læknar hafa lært á langri ævi að það eru engar töfralausnir til. Öll lyf hafa sínar aukaverkanir. Frjáls og óheft notkun ofskynjanaefna til lækninga yrði fljót að snúast upp í andhverfu sína. Tilraunastarfsemi Timothy Learys rann út í sandinn fyrir nokkrum áratugum og hætt er við að þessi bylgja fari sömu leið.“