Hæstiréttur hefur hafnað beiðni Borgarbyggðar um áfrýjunarleyfi og mun því ekki taka fyrir mál sveitarfélagsins gegn brottreknum sveitarstjóra, Gunnlaugi Auðuni Júlíussyni. Borgarbyggð ákvað að freista þess að fá áfrýjað dómi Landsréttar sem hafði komist að þeirri niðurstöðu að Gunnlaugur hefði átt rétt á sex mánaða biðlaunum en ekki bara þriggja mánaða uppsagnarfresti.

Núverandi sveitarstjóri Borgarbyggðar, Stefán Broddi Guðjónsson, gerði DV grein fyrir þeirri ákvörðun sveitarfélagsins að freista þessa að áfrýja málinu í desember síðastliðnum og sagði meðal annars:

„Okkur þykir ekkert léttvægt að vera dæmd til að greiða fjórar milljónir króna til fyrrum sveitarstjóra og til viðbótar þrjár milljónir króna í málskostnað í máli sem að mjög litlu leyti féll á móti Borgarbyggð.“

Hæstiréttur tilkynnti Borgarbyggð í dag að umsókn um leyfi til að áfrýja dómi Landsréttar í málinu hefði verið hafnað. Umsóknin byggði á því að dómur Landsréttar væri rangur, að úrslit málsins hafi verulegt almennt gildi um túlkun samningsbundinna ákvæða um biðlaun starfsmanna sveitarfélaga, og það varði mikilvæga hagsmuni sveitarfélagsins.

Hæstiréttur vísaði þessum röksemdum öllum á bug og hafnaði beiðninni.