Uppfært klukkan PffHundurinn Balto sem hvarf á fimmtudagskvöldið í Hafnarfirði er fundinn. Sandra Ósk Jóhannsdóttir, meðlimur Hundasveitarinnar, sem er í helgarviðtali DV, segir að hinn 14 mánaða Husky hundur hafi fundist nú um eittleytið eftir hádegi í dag. Leitað hafði verið að Balto í þrjá og hálfan sólahring.

Sandra Ósk segir að eftir ábendingu í gær um að Balti hefði sést í Heiðmörk hefði leitin verið færð þangað um klukkan sex þar sem leitarfólk sá hann. ,,Sett var upp matarstöð og dróni á loft og voru sjálfboðaliðar búnir að stilla sér upp kringum radíusinn sem hann hélt sig á. Hundasveitin náði að vinna upp traust og nálgast Balto með matargjöfum en ekki vildi hann láta ná sér þó hann væri að borða úr lófunum hennar Eyglóar í Hundasveitinni.“

Fyrri eigandi Balto ók frá Egilsstöðum með hraði. ,,Hann hoppaði i fangið hennar! Það hefur skipt sköpum að færa hann úr flóttaviðbragðinu sem við náðum að gera i nótt með miklum tíma og þolinmæði,“ segir Sandra Ósk. Hún og aðrir leitamenn þakka kærlega fyrir veitta aðstoð og allar ábendingar sem hafa borist. ,,Án þeirra hefðum við ekki getað þetta.“

Sandra Ósk segist hafa haldið heim um klukkan fimm í nótt eftir langa og stranga leit. ,,Með adrenalínið í botni og gjörsamlega búin á því,“ bætir hún við.

Aftur á móti eru ekki langar stundirnar milli stríða hjá Hundasveitinni því Sandra og félagar fara aftur á stúfana nú um klukkan tvö. Nú er leitað að chihuahua hundinum Tristan sem hefur verið týndur frá því í gær.

Uppfært 14:30. Nágrannakona fann Tristan skjálfandi og hungraðan. Hann hafði lokast inn í útiskála hjá henni en hefur nú verið komið til eigenda sinna. 

Hér má sjá myndbönd sem tekin voru við að lokka Balto.