Rússneski þingmaðurinn Oleg Morozov kom fram í spjallþættinum, „60 mínútur“ á rússnesku ríkissjónvarpsstöðinni Rossiya-1 á mánudagskvöldið. Þar sagði hann að Rússar eigi að reyna að ræna varnarmálaráðherra frá einhverju NATÓ-ríki þegar hann er í heimsókn í Úkraínu.

Markmiðið er að yfirheyra ráðherrann til að komast að hvaða „skipanir“ Vesturlönd hafa gefið ríkisstjórninni í Kyiv.

„Kannski er þetta besta áætlunin sem ég hef sett fram . . . að einhvern tímann í náinni framtíð muni stríðsráðherra frá einu NATÓ-ríki ferðast með lest til Kyiv til að ræða við Zelenskyy. En hann kemst ekki á áfangastað. Þess í stað vaknar hann í Moskvu,“ sagði Morozov sem hefur setið á þingi síðan 1993 fyrir flokk Vladímír Pútíns, Sameinað Rússland.

Þegar þáttastjórnandinn spurði hann staðfesti hann að ræna ætti ráðherranum til að geta yfirheyrt hann í Moskvu.