Undir morgun var tilkynnt um konu sem gengi öskrandi á milli húsa í Kópavogi. Lögreglan kannaði málið og kom þá í ljós að konan hafði misst hund sinn út og var að leita að honum. En fór þó heldur mikinn við þá leit að mati svefnþurfi nágranna.

Í Miðborginni voru tveir eftirlýstir aðilar handteknir. Annar þeirra reyndi fyrir sér í spretthlaupi við lögreglumenn en eins og segir í tilkynningu lögreglunnar þá varð hann að láta í minni pokann fyrir þrautþjálfuðum laganna vörðum.

Lögreglan hafði afskipti af fimm manns á höfuðborgarsvæðinu í gærkvöldi og nótt vegna fíkniefnamála. Að auki var húsleit gerð í Kópavogi vegna gruns um að fíkniefni væru ræktuð í húsinu. Svo reyndist vera og var hald lagt á fíkniefni og búnað til ræktunar. Einn var handtekinn vegna málsins og vistaður í fangageymslu.

Innbrotsþjófur var staðinn að verki og handtekinn í fyrirtæki í austurborginni skömmu eftir miðnætti. Hann hafði spennt upp glugga og komist inn. Hann er nú í fangageymslu og verður yfirheyrður síðar í dag.

Eldur kom upp í bifreið í Hafnarfirði í nótt. Annar bíll skemmdist einnig af völdum eldsins. Ekki er vitað hver eldsupptökin voru.

Einn nefbrotnaði í átökum í Kópavogi undir morgun. Hann var fluttur á bráðamóttöku með sjúkrabifreið en nefbrjóturinn var handtekinn og er nú í fangageymslu og bíður þess að vera yfirheyrður.