Leyniskyttan Wali, sem sagður er besta leyniskytta heims, hefur staðfest í viðtali við kanadískan miðil að hann sé á lífi í Úkraínu. Mikið var gert úr því í fjölmiðlum að Wali, sem heitir fullu nafn Oliver Lavigne-Ortiz og er frá Quebec, hefði haldið til Úkraínu að berjast við Rússa. Frægðarsól hans sem leyniskyttu reis eftir að Lavigne-Ortiz barðist í Afghanistan og Írak og er hermt að hann hafi fellt allt að 40 vígamenn ISIS á einum degi.
Stuttu eftir að Wali mætti á vígvöllinn á Úkraínu fóru að berast fréttir þess efnis að hann hefði fallið í átökunum. DV fjallaði um sögusagnir um helgina en þær mátti meðal annars rekja til þess að Wali heldur úti vinsælli Facebook-síðu þar sem hann hefur skrifað stuttar færslur um þátttöku sína í stríðsrekstri. Ekkert hafði hins vegar heyrst frá honum í næstum fimm daga sem er óvenjulegt og gaf sögusögnum um dauða hans byr undir báða vængi.
Orðrómur um að besta leyniskytta heims hafi fallið í Úkraínu
Ljóst var að víg heimsfrægrar leyniskyttu gæti nýst vel í áróðursstríði Rússa og fælt erlenda sjálfboðaliða frá því að aðstoða Úkraínumenn. Dauði Wali var hins vegar ýktur en í gær steig hann fram í viðtali við kanadíska miðilinn Le Presse. Þar segir Wali að hann hafi síðastur allra frétt af sínu eigin andláti. Í viðtalinu segist hann hafa verið í þrjá daga nærri víglínunni og setið undir nánast linnulausri skothríð frá stórskotaliði Rússa. „Í eitt skipti sá ég víghnött fara um þrjá metra frá höfði mínu. Þetta var súrealískt,“ segir Wali í viðtalinu. Að lokum hafi hann náð að koma sér í öruggara skjól og að hann hafi ekki orðið meint af.
Í kjölfarið birti hann svo stutta yfirlýsingu á Facebook-vefsvæði sínu, sem heutir La Torche et l’Épée, um að hann væri enn ómeiddur.
