Twitter-reikningur tónlistarmannsins Bubba Morthens er horfinn. Bubbi hefur verið mjög virkur á þessum samfélagsmiðli undanfarin ár og margir eiga eflaust erfitt með að ímynda sér Twitter án Bubba.

Undanfarið hefur Bubbi verið gagnrýndur fyrir samstarf sitt við tónlistarmanninn Auðunn Lúthersson, sem eins og alþjóð veit, hefur legið undir ásökunum um kynferðisbrot. Margir kunna vissulega vel að meta samstarf þeirra kappa og vilja framgang Auðuns sem mestan en gagnrýnin er hvað hatrömmust á Twitter.

Í dag kom fram í fréttum að lögmaður Bubba Morthens ásamt framkvæmdastjóra Öldu Music, Sölva Blöndal, funduðu með Stefáni Eiríkssyni útvarpsstjóra og kröfðust þess að því yrði svarað hvers vegna nýlegt lag Bubba og Auðuns sé lítið sem ekkert spilað á Rás 2 á meðan það njóti mikilla vinsælda á Spotify.

Sjá einnig: Lögmaður Bubba á fund með útvarpsstjóra út af meintri útilokun lags Bubba og Auðs

Fréttir um þetta hleyptu endurnýjuðum krafti í gagnrýnendur Bubba og Auðuns á Twitter og Bubbi var merktur í fjölmörgum tístum á Twitter í dag frá baráttufólki gegn kynferðisofbeldi og öðrum.

Hvort þetta hafi valdið því að Bubbi lokaði reikningi sínum eða ekki skal ósagt látið. DV hefur ekki tekist að ná sambandi við hann til að fá skýringar á þessu en mun birt þau svör síðar ef þau berast.