Tveir pólskir ríkisborgarar, Tomas Gober og Lukasz Gorny, voru dæmdir í sex mánaða fangelsi í Héraðsdómi Reykjaness fyrir innflutning á tæplega tvö þúsund Oxycontin-töflum. Mennirnir voru gripnir í Leifsstöð þann 4. maí á þessu ári eftir að hafa komið til landsins í flugi Wizzair frá Varsjá. Tollverðir fundu töflurnar, 80 mg af Oxcontin, í nærbuxunum mannanna. Alls 670 töflur hjá Lukasz og 1.244 töflur hjá Tomas.
Mennirnir höfðu engan sakaferil að baki en hvorugur þeirra mætti við þingfestingu málsins og var því dæmt í málinu að þeim fjarstöddum.
Eins og áður segir fengu þeir báðir sex mánaða fangelsisdóm en þar sem þeir héldu ekki uppi vörnum í málinu var þeim ekki gert að greiða neinn sakarkostnað.
Þetta er eitt af fjölmörgum málum sem hafa komið upp síðustu misseri þar sem verið er að flytja Oxycontin frá Póllandi til Íslands en söluverð lyfjanna er mjög hátt á svörtum markaði hérlendis.
