Stjórn Ferðafélags Íslands hefur sent frá sér yfirlýsingu í kjölfar afsagnar forseta félagsins, Önnu Dóru Sæþórsdóttur, en samhliða afsögninni sakaði hún aðra stjórnarmenn um dónaskap, útilokun og að hafa barist hart gegn ásökunum gegn stjórnarmeðlimum, núverandi og fyrrverandi, um ótilhlýðilega háttsemi og grófa kynferðislega áreitni.
Sjá einnig:
Í yfirlýsingu stjórnar er ásökununum vísað á bug og lýsir stjórn yfir vonbrigðum yfir því hvernig Anna Dóra „lýsir viðskilnaði sínum við félagið.“.
Í yfirlýsingu segir að til staðar séu fagleg ferli og viðmið um hvernig taka skuli á málum sem komi upp varðandi samskipti innan félagsins, þar með talin mál er varði kynferðislega áreitni. Tekið hafi verið á öllum slíkum málum með faglegum og skipulögðum hætti og þau leidd til lykta.
Hins vegar staðfestir stjórn að til staðar hafi verið vandamál í samskiptum innan stjórnar við Önnu Dóru. En það hafi verið vegna stjórnarhátta hennar og framkomu hennar við framkvæmdastjóra félagsins.
Yfirlýsingin í heild sinni:
Yfirlýsing frá stjórn Ferðafélags Íslands
Stjórn Ferðafélags Íslands lýsir yfir vonbrigðum og furðu með hvernig fráfarandi forseti lýsir viðskilnaði sínum við félagið. Stjórnin vísar algjörlega á bug þeim ásökunum og lýsingum sem hún setur fram í yfirlýsingu sinni.
Hjá Ferðafélagi Íslands hafa verið til staðar fagleg ferli og viðmið um hvernig tekið skal á málum sem koma upp í samskiptum innan félagsins, þar með talið mál er varða kynferðislega áreitni. Tekið hefur verið á öllum málum af þessu tagi með faglegum og skipulögðum hætti og þau leidd til lykta.
Stjórn Ferðafélagsins getur staðfest að til staðar hafa verið vandamál í samskiptum innan stjórnar við fráfarandi forseta. Þessi samskiptavandi er tilkominn vegna stjórnarhátta hennar og framkomu við framkvæmdastjóra félagsins.
Stjórn Ferðafélags Íslands er skipuð fjölbreyttum hópi einstaklinga úr ólíkum áttum, bæði konum og körlum. Allt stjórnarfólk hafnar þeim lýsingum sem fráfarandi forseti hefur komið fram með.
Fh stjórnar FÍ
Sigrún Valbergsdóttir varaforseti FÍ
