Örvunarbólusetningar gegn Covid-19 fyrir 60 ára og eldri hefjast í Laugardalshöllinni á morgun. Þetta kemur fram í tilkynningu frá Heilsugæslu höfuðborgarsvæðisins.
Bólusetningarnar fara fram í Laugardalshöll. Bólusett verður milli klukkan 11 og 15 alla virka daga frá þriðjudeginum 27. september til föstudagsins 7. október og eru allir sem geta hvattir til að mæta.
Samhliða örvunarbólusetningu við Covid-19 verður boðið upp á bólusetningu við inflúensu fyrir þá sem vilja.
Fjórir mánuðir þurfa að hafa liðið frá því einstaklingur fékk þriðja skammt af bóluefni. Notast verður við nýja útgáfu af bóluefni við Covid-19 og verður því ekki boðið upp á grunnbólusetningu fyrir þá sem ekki hafa verið bólusettir áður. Fólk er vinsamlegast beðið um að mæta í stuttermabol innst klæða til að auðvelda bólusetningu.
Heilbrigðisstofnanir utan höfuðborgarsvæðisins munu annast bólusetningar fyrir sína skjólstæðinga.
Þegar þessu bólusetningarátaki fyrir 60 ára og eldri er lokið, þann 7. október næstkomandi, er stefnt að því að bjóða þeim sem eru yngri en 60 ára bólusetningu á heilsugæslustöðvum. Verður þar einnig í boði bólusetning gegn inflúensu.
