Gleðigöngunni í Osló, sem átti að fara fram í dag, hefur verið aflýst í kjölfar skotárásar sem framin var í nótt á skemmtistaðnum London Pub en um er að ræða skemmtistað hinsegin fólks. Tveir eru látnir og fjórtán særðir eftir árásina. Lögreglan fékk fjölmargar tilkynningar um árásina klukkan 01:14 í nótt, var mætt á vettvang skömmu síðar og handtók hinn grunaða þremur mínútum eftir það.

Sá grunaði hefur verið ákærður fyrir bæði morð og hryðjuverk vegna þessa en um er að ræða norskan ríkisborgara sem er upprunalega ættaður frá Íran. Hann er svokallaður góðkunningi lögreglunnar en hafði fram að þessu einungis verið dæmdur fyrir smáglæpi.

Í yfirlýsingu frá skemmtistaðnum kemur fram að allt starfsfólk staðarins sé óhult og er því ljóst að þeir sem urðu fyrir árásinni voru gestir á staðnum. Þá segir í yfirlýsingu staðarins að um „hreina illsku sé að ræða“.

Þau sem sjá um skipulagið á gleðigöngunni í Osló tjáðu sig um málið á Facebook-síðu gleðigöngunnar og greindu þar jafnframt frá því að henni hefur verið aflýst vegna ráðlegginga frá lögreglunni. „Við munum fylgja ráðleggingum lögreglunnar og hugsa vel um hvort annað,“ segir Inge Kristin Haugsevje, formaður gleðigöngunnar í Osló.

Jonas Gahr Støre, forsætisráðherra Noregs, vottaði fórnarlömbum samúð á Facebook-síðu sinni. „Við vitum ekki ennþá hvað var á bakvið þetta hræðilega atvik en hinsegin samfélagið sem er nú hrætt og syrgir hin látnu, ég vil segja við ykkur að við stöndum öll með ykkur,“ segir Jonas í færslunni.