Íslenska ríkið hefur viðurkennt að hafa brotið gegn kærendum í fjórtán málum sem hafa verið til meðferðar hjá Mannréttindadómstól Evrópu (MDE). Dómstóllinn hefur lokið meðferð sextán mála sem eru af sama meiði og Landsréttarmálið. Kærendur fá málskostnaðinn greiddan og eiga þess kost að krefjast endurupptöku mála sinna.

Fréttablaðið skýrir frá þessu í dag. Fram kemur að í málunum fjórtán, sem ríkið viðurkennir brot í, eigi kærendurnir það sameiginlegt að einhver þeirra fjögurra dómara við Landsrétt, sem dómur MDE í Landsréttarmálinu nær yfir, dæmi í máli þeirra.

Ákvörðun MDE var birt í gær en samkvæmt henni lýkur málunum með vísan til yfirlýsingar íslenska ríkisins. Það lýsir því yfir að brotið hafi verið á kærendum, að hver þeirra fái greiddar 4.000 evrur í málskostnað og einnig lýsir ríkið því yfir að þeir geti krafist endurupptöku sinna mála hjá endurupptökudómi.

Meðal þeirra sem kærðu eru Jens Guðmundsson, fyrrum rannsóknarlögreglumaður, sem var dæmdur í 15 mánaða fangelsi fyrri spillingu og brot í starfi. Eldin Skoko og Fjölnir Guðsteinsson sem voru dæmdir fyrir nauðgun og Otto Örn Þórðarson sem var dæmdur fyrir smygl á amfetamíni.

Nánar er hægt að lesa um málið í Fréttablaðinu í dag.