Karl-Petter Thorwaldsson, atvinnumálaráðherra Svíþjóðar, tilkynnti á fréttamannafundi í morgun að sænska ríkið muni ekki leggja skandinavíska flugfélaginu SAS til meira fé. Hann sagði að ríkisstjórnin sé reiðubúin til að sætta sig við að hlutur Svía í félaginu minnki.

SAS tapaði sem nemur tæpum 60 milljörðum íslenskra króna á fyrsta ársfjórðungi. Danska ríkisútvarpið segir að í síðustu viku hafi félagið tilkynnt að ekki sé öruggt að það geti staðið við björgunaráætlunina sem hafði verið sett fram til að reyna að bjarga félaginu.

Hluti af þessari áætlun er að eigendur félagsins leggi því til fé. Á fréttamannafundinum í morgun sagði Thorwaldsson að nú væri boltinn hjá SAS, félagið verði að hrinda áætlunum sínum í framkvæmd svo það geti haldið starfsemi sinni áfram.

Sænska ríkið er annar af tveimur stærstu eigendum félagsins en það á 21,8% hlut í því. Danska ríkið á einnig 21,8% hlut í félaginu.