Íbúar í Hlíðahverfi eru margir hverjir afar ósáttir við þau áform Reykjavíkurborgar að setja upp auglýsingaskilti við Klambratún. Hið nýja skilti yrði á tvö hundruð metra kafla við túnið þar sem þegar hafa risið tvö slík skilti. Áformin voru auglýst á vef Reykjavíkurborgar þann 9. maí síðastliðinn og mun frestur til að gera athugasemdir renna út þann 7. júní næstkomandi. Aðeins íbúar í ákveðnum húsum við Lönguhlíð, nánar tiltekið 7, 9, 11, 13, 15 og 17 teljast hagsmunaðilar og mega gera athugsemdir við áformin.

Breki Karlsson, formaður Neytendasamtakanna og íbúi í Hlíðahverfi, hefur vakið athygli á málinu og segir auglýsingavæðingu almannnarýmis varhugaverða. Í viðtali við Vísi segir hann að það skjóta skökku við að fólk sem sé að reyna að eiga notalega frístund á Klambratúni sé neytt til þess að neyta auglýsinga með þessum hætti. Telur hann ennfremur að þessi þrjú auglýsingaskilti á stuttum kafla brjóti gegn ákvæðum samþykktar borgarinnar um slík skilti en þar segir meðal annars að skiltin eigi ekki að vera fólki til ama eða óþæginda.

Reynt að lauma skiltinu framhjá skipulagi

Þá sakar Breki Reykjavíkurborg að reyna að lauma skiltinu framhjá hverfisskipulagi fyrir Háteigshverfi sem verið er að vinna í.

„Ef það á að auglýsingavæða Klambratún verður að fjalla um það heildstætt í hverfisskipulagi, en þarna er verið að lauma því fram hjá skipulaginu. Þetta er bara vanvirðing við þetta ferli sem hverfisskipulagið er,“ segir Breki.

Breki hefur verið virkur við að benda á málið í íbúðarhópi Hlíðahverfis og hvetja fólk til mótmæla.

Ljóst er að fjölmargir eru á sama máli og Breki en einn þeirra er fjölmiðlamaðurinn Kristinn Hrafnsson, ritstjóri Wikileaks.

„Nú á ég hagsmuna að gæta sem íbúi við Klambratún en þetta er svívirða við hvaða almannarými sem er í borginni. Gjörið svo vel og bakkið með þessa þvælu. Það getur ekki verið í neinu samræmi við vilja borgarbúa að sóða allt út í auglýsingaskiltum,“ skrifar Kristinn í Facebook-færslu.

Segir hann tilviljun hafa ráðið því að hann rak augun í skipulagsauglýsinguna en mótmælafrestur er við það að renna út eins og áður segir.