„Sólin sagði mér að gera þetta,“ segir götulistamaðurinn Juan en nýtt verk eftir hann á útvegg í Breiðholti hefur vakið mikla lukku á íbúasíðu á Facebook. Óhætt er að segja að lítil prýði hafi verið af veggnum sem var þakinn veggjakroti áður en Juan tók til hendinni. Í samtali við DV segir hann enginn hafi pantað verkið heldur hafi hann átt frumkvæðið sjálfur. „Innblásturinn var allsráðandi. Þetta hefur verið veggur sem alltaf er hægt að mála til að fríska upp á svæðið. Í gær var svo sólríkt og hlýtt að það varð að gerast,“ segir Juan sem var aðeins nokkrar klukkustundir að mála listaverkið sem nú gleður íbúa Breiðholts.

Juan hefur gert veggmyndir frá 12 ára aldri og hefur vakið nokkra athygli fyrir verk sín í Reykjavík. Meðal annars fallegt verk við Hofsvallagötu þar sem Super-Mario og Hallgrímskirkja eru í lykilhlutverki. Verkið vakti ekki síst athygli vegna stöðugra skemmdarverka sem það varð fyrir á sínum tíma en Juan lagaði verkið jafnharðan og er það sannkölluð bæjarprýði í dag.

Þá myndskreytti hann einnig heilan vegg á Tjarnarbíói auk fjölmargra verka í Reykjavík og Keflavík. Þá var Juan fenginn til þess að lífga upp á nýjan Miðbæ Selfoss með veggjalist sinni en það verkefni hefur vakið mikla athygli.

Óhætt er að mæla með Facebook-síðu Juan en þar má sjá fleiri af hans helstu verkefnum. Einnig er hægt að fylgjast með verkum hans á Instagram-síðunni hans @juanpicturesart.