Listmálarinn Þrándur Þórarinsson er þekktur fyrir ögrandi verk sín sem tala inn í nútímann.
Meðal hans frægustu verka eru málverk af Bjarna Benediktssyni fjármálaráðherra að kyssa hring Þorsteins Más Baldvinssonar, forstjóra Samherja,annað málverk af Bjarna að klæða sig í nábrók og svo málverkið Klausturfokk sem er af þingmönnunum sex sem sátu við drykkju á kránni Klaustri um árið og níddu skóinn af flestöllum sem til tals komu.
Þrándur er nú búinn að mála nýtt verk þar sem Jón Gunnarsson, ráðherra dómsmála, er íklæddur nasistabúningi. Á myndina er skrifað Inglourious Basterds sem er tilvísun í stríðsmynd eftir Quentin Tarantino sem gerist í Þýskalandi nasismans.
Eins og nýlegar fréttir bera með sér hefur Jón Gunnarsson farið fremstur í flokki fyrir stærstu brottvísun í Íslandssögunni sem felur í sér að tæplega 300 flóttafólki verði vísað úr landi. Hluti fólksins hefur verið hér á landi í yfir tvö ár, myndað fjölskyldu, eignast barn og er í fastri vinnu. Til stendur að meirihluti fólksins fari til Grikklands þar sem flóttafólk býr við ómannúðlegar aðstæður á götunni.
