Sú ráðstöfun nokkurra íbúa við Granaskjól að setja upp trampólín sem aðeins er ætlað börnum úr tilteknum húsnúmerum í götunni heldur valdið óánægju og sárindum meðal annarra íbúa á svæðinu. Greint er frá málinu í Facebook-færslu í íbúahópi Vesturbæinga og segir þar:

„Ég var á röltinu í Granaskjóli með vinkonu minni og börnunum hennar sem býr í hverfinu og hún benti mér á þetta rugl!

Nú eru foreldrar nokkurra íbúða búin að planta trampólíni á rólóvöll sem er á borgarlandi og þar af leiðandi í eigu okkar allra og setja reglur um að einungis börnin þeirra megi nota það¿!?

Nokkur atriði!

Hversu “privilege” þarftu að vera til að halda að þú getir tekið land af rólóvelli og búið til reglur um að einungis börnin þín megi leika á því?

Hvers konar gildi & lífs reglur er verið að kenna börnunum?

– Þessi er meira virði en hinn?

– Þú mátt ekki leika hér af því þú býrð ekki hér?

– Við ætlum að útiloka þig?

Hvaða rugl/tíska er það að efnað fólk í Vesturbænum sé að taka land í “fóstur” aka stela landi hægri vinstri?

Ég ætla að biðja þessa foreldra að taka niður trampólínið af landinu mínu og þínu!

Eða að taka niður skiltið og eyða út þessar ljótu reglu.“

Trampólínið er utan húslóða og virðist sett upp í almenningi. Í umræðum íbúanna kemur fram það sjónarmið að þessi aðgerð sé ólögleg þar sem trampólínið sé sett upp á borgarlandi. Þetta er þó ekki rétt. Samkvæmt frétt mbl.is er hið umdeilda trampólín ekki á borgarlandi. Um er að ræða sameiginlega lóð aðliggjandi húsa sem sjá um rekstur og viðhald hennar.

Hvað sem því líður er þessi ráðstöfun gagnrýnd mjög meðal íbúanna sem þykir skilaboðin sem í þessu felast vera súr. Einn íbúi segir svo frá að 7 ára dóttir hennar hafi komið miður sín heim til sín og sagt að „þetta væri bara fyrir krakkana í Granaskjólinu og hún myndi ekki fara á það. Ég trúði henni ekki en svo sá ég miðann. Það er fullt af krökkum í hverfinu sem labba þarna um og hafa gaman að og spá ekkert í þessum miða en svo eru önnur börn sem taka þessum skilaboðum mjög alvarlega og þora ekki. Við foreldrar verðum að passa hvaða skilaboð við erum að segja börnunum. Trampólínið er frábært en skilaboðin eru það EKKI.“