Rússneski herinn hefur undanfarnar tvær vikur nálgast Kyiv, höfuðborg Úkraínu, en nú er þorri rússnesku hermannanna einungis 24 kílómetrum frá borginni. Úkraínumenn eru þessa stundina að búa sig undir að verja borgina fyrir innrásarhernum.
Ljóst er að bardaginn gæti orðið virkilega blóðugur. Í viðtali við BBC sagði úkraínski stjórnmálamaðurinn Sviatoslav Yurah að orrustan um Kyiv gæti orðið í líkingu við orrustuna í Stalíngrad en tæpar tvær milljónir manna létust í þeirri orrustu. Orrustan um Stalíngrad var sú blóðugasta í allri seinni heimstyrjöldinni.
Sovétmenn sigruðu orrustuna í Stalíngrad en Yurah varar Rússana við að Kyiv verði þeim að falli – líkt og Stalíngrad varð nasistunum í síðari heimsstyrjöldinni.
„Þetta er risastór borg með milljónum borgara og ef Rússarnir reyna að koma inn í hana þá fá þeir heljarinnar bardaga,“ sagði Yurah í viðtalinu við BBC.
Rose Gottemoeller, fyrrum staðgengill framkvæmdastjóra Atlantshafsbandalagsins, ræddi einnig við BBC um stríðið í Úkraínu og komandi innrás Rússa í Kyiv. Gottemoeller er skeptísk á að rússneski herinn nái miklum árangri með því að ráðast beint inn í höfuðborgina.
„Ég velti því fyrir mér hvort þeir eigi möguleika á að hópa sig aftur saman á þessum tímapunkti því skipulagið þeirra er í svo slæmu standi, þeir eru eiginlega ekki með eldsneytisbirgðirnar sem þeir þurfa til að ráðast á Kyiv,“ sagði Gottemoeller.
