Um tvöleytið í nótt var drukkinn maður handtekinn í miðborginni. Maðurinn hafði verið að ónáða vegfarendur og stofna til slagsmála. Hann hafði m.a. sest inn í bíl hjá konu sem hann þekkti ekki og neitað að fara út úr bílnum fyrr en lögregla kom á vettvang og skipaði honum að yfirgefa bílinn. Maðurinn var færður á lögreglustöð þar sem fyllt var út eyðublað um brot á lögreglusamþykkt o.fl. og hann laus að því loknu.

Þetta kemur fram í dagbók lögreglunnar. Einnig segir frá því að ölvuð kona var handtekin í miðborginni á þriðja tímanum í nótt. Konan var æst og að trufla störf lögreglu, fór ekki að fyrirmælum lögreglu og veittist að lögreglumanni. Konan var færð á lögreglustöð þar sem fyllt var út eyðublað um brot á lögreglusamþykkt. Konan róaðist er hún var komin á lögreglustöðina og var hún laus að lokinni upplýsingatöku.

Á fimmta tímanum í nótt var kona handtekin í miðborginni vegna gruns um að hún væri að selja áfengi úr bíl sínum en í honum var töluvert magn af áfengi. Einnig var konan ekki með gild ökuréttindi.

Um hálfáttaleytið í gærkvöld var tilkynnt um líkamsárás í Hafnarfirði. Manni var hent út af bar og hlaut hann við það aflögun á fæti og skrámur í andliti. Var hann fluttur með sjúkrabíl á Bráðadeild til aðhlynningar.