Ný skoðanakönnu Maskínu bendir til þess að mikið hrun hafi verið á ánægju áhorfenda með Áramótaskaupið milli ára. Samkvæmt könnuninni sögðu 45,1% áhorfenda að Áramótaskaupið 2021 hefði verið mjög gott (14,4%) eða frekar gott (30,7%). Til samanburðar voru 84,7% áhorfenda sem sögðu að Áramótaskaupið árið 2020 hefði verið mjög gott eða frekar gott og 71,2% voru á þeirri skoðun árið 2019.
Könnun var lögð fyrir í Þjóðargátt Maskínu sem dregin er með tilviljun úr Þjóðskrá. Svarendur eru alls staðar af landinu og 18 ára eða eldri. Könnunin fór fram dagana 14. til 19.janúar 2022 og voru svarendur 952 talsins. Alls bárust 905 gild svör, 36 horfðu ekki á Skaupið, 11 sögðust ekki vita neitt um spurninga og einn vildi ekki taka afstöðu.
Leikstjóri Áramótaskaupsins í ár var Reynir Lyngdal en þetta er þriðja árið í röð sem hann heldur um stjórnartaumana. Handritshöfundar Skaupsins voru þau Vilhelm Neto, Bergur Ebbi Benediktsson, Hugleikur Dagsson, Katla Margrét Þorsteinsdóttir, Gagga Jónsdóttir og Lóa Hjálmtýsdóttir.
Konur voru talsvert ánægðari með Skaupið en karlar. 40% karla sögðu að skaupið hefði verið mjög gott eða frekar gott en rétt rúmlega 50% kvenna. Skiptingin eftir aldri var þó nokkuð svipuð.
Þá var áberandi hvað kjósendur Pírata og Vinstri-Grænna voru ánægðari með Skaupið samanborið við kjósendur annarra stjórnmálaflokka. 60,7% kjósenda Vinstri Grænna töldu að skaupið hefði verið mjög gott eða frekar gott á meðan 55,3% kjósenda Pírata voru á sama máli. Kjósendur Miðflokksins voru hins vegar síst hrifnir af Skaupinu en aðeins 33,4% þeirra voru ánægðir með þáttinn.
