Íslendingar töpuðu með eins marks mun gegn Króötum 22:23 í köflóttum leik. Ísland náði yfirburðastöðu um miðjan fyrri hálfleik, 9:4, en Króatar sneru leiknum við, minnkuðu muninn fram að hálfleik niður í 10:12 og sigldu fram úr í síðari hálfleik, náðu þá mest fimm marka forystu.
Ísland náði að snúa leiknum aftur við, vinna upp forskotið og komast yfir. En það sem varð liðinu að falli undir lokin var slæm nýting á dauðafærum og Króatar náðu að merja eins marks sigur.
Hornamaðurinn Orri Freyr Þorkelsson var markahæstur með 6 mörk og Ómar Ingi Magnússon skoraði 5. Elvar Ásgeirsson skoraði fjögur mörk.
Viktor Gísli Hallgrímsson stóð í markinu allan leikinn og varði 10 skot.
Síðasti leikur Íslands er gegn Svartfjallalandi á miðvikudag. Von um sæti í undanúrslitum er enn fyrir hendi en frammistaða hins unga íslenska liðs á mótinu er samt frábær, sérstaklega þegar haft er í huga gífurleg forföll lykilmanna vegna Covid-smita.
