Björgunarsveitir frá Akureyri og Varmahlíð voru rétt í þessu að ljúka útkalli á Öxnadalsheiði. Klukkan 14:15 var tilkynnt að tveir bílar væri fastir í snjó á heiðinni en bílarnir voru á leiðinni til Akureyrar frá Reykjavík.

„Þar sem ekki var vitað nákvæmlega hvernig færðin var né nákvæm staðsetning bílanna, þá voru björgunarsveitir sendar úr báðum áttum,“ segir Davíð Már Bjarnason, upplýsingafulltrúi Landsbjargar, í tilkynningu um útkallið.

Björgunarsveitarfólk kom að bílunum efst í Bakkaselsbrekku um klukkutíma eftir að útkallið barst. „Með góðri samvinnu gekk vel að losa bílana og var ökumönnum þeirra boðin fylgd austur yfir heiðina. Þeir gátu þá haldið för sinni áfram og voru komni niður af heiðinni ásamt björgunarsveitabílum fyrir stuttu,“ segir Davíð en Öxnadalsheiði hefur verið lokuð síðan 22:00 í gærkvöldi.