„Var að lenda í því sem enginn vill lenda í,“ segir Hilmar Ögmundsson, ráðgjafi hjá fjármálaráðuneyti Grænlands, í færslu sem hann birti á Facebook-síðu sinni í dag en bíl hans var stolið fyrir utan heimili hans Kópavoginum. Vísir fjallaði um málið fyrr í dag.

Hilmar segir í færslunni að hann hafi sett bílinn í gang, farið inn að ná í börnin og þá hafi ungur maður verið kominn í bílinn og verið við það að keyra af stað.

„Ég náði að opna hurðina og grípa í hann en hann keyrði með mig af stað og ég datt í götuna. Hann var næstum búinn að keyra á kyrrstæðan bíl og drepa mig,“ segir hann og biður fólk að hafa augun opin fyrir dökkbláum Peugeot 407 station með bílnúmerið LV-963.

Í samtali sínu við Vísi sagði Hilmar að lögreglan hafi verið fljót að bregðast við og að hún hafi séð bílinn á Fífuhvammsvegi í Kópavogi á myndavélum hjá sér.

DV ræddi við Hilmar vegna málsins en hann segir að þrátt fyrir að bíllinn hafi sést á myndavélunum þá sé hann enn ekki fundinn. Hann segir að bíllinn hafi síðast sést vera í leiðinni að Reykjavík en svo hafi hann ekki farið framhjá fleiri myndavélum.

Hilmar er þessa stundina að aka sjálfur um höfuðborgarsvæðið í von um að hann finni bílinn og óprúttna aðilann sem stal honum, það sé betra en að sitja heima og bíða eftir að eitthvað gerist. „Þetta er eins og að leita að nál í heystakki,“ segir hann í samtali við DV en hann vonast þó til þess að eitthvað komi upp úr leitinni.