Björgunarsveitir hafa verið kallaðar út nokkuð oft í dag vegna ófærðar eftir annars erilsaman nýársdag, þegar óveður gekk yfir mest allt landið. Í tilkynningu frá Landsbjörg kemur fram að dagurinn í dag hafi byrjaði á því að björgunarsveitafólk kom heilbrigðisstarfsmönnum til og frá vinnu á Héraði.
Hvassir vindstrengir gengu yfir Vestmannaeyjar í morgun og var björgunarsveit kölluð út til að koma böndum á þak sem var við það að flettast af húsi í bænum, þar varð talsvert tjón. Það sem af er degi hafa björgunarsveitir í tvígang verið kallaðar út vegna sjúkraflutninga, greiða þurfti leið fyrir sjúkrabíl og flytja sjúkraflutningamenn á vettvang, í Laxárdal og í Hróarstungu í Héraði.
Til viðbótar hefur ökumönnum bíla sem lent höfðu í ófærð verið komið til aðstoðar ásamt tilfallandi fokverkefnum.
