Á tíunda tímanum í gærkvöldi sáu lögreglumenn að kona ók niður umferðarskilti í Breiðholti. Hún er grunuð um ölvun við akstur og var því handtekin. Hún var vistuð í fangageymslu að sýnatöku lokinni. Á öðrum tímanum í nótt höfðu lögreglumenn afskipti af manni fyrir utan verslun í Breiðholti. Sá var mjög ölvaður og hafði stungið töluvert af vörum á sig áður en hann gekk út úr versluninni. Starfsmaður verslunarinnar hafði afskipti af honum en hann brást illa við því og reyndi að komast undan á rafskútu. Maðurinn afhenti lögreglunni allar vörurnar sem hann hafði stolið.

Þrír ökumenn voru handteknir í gærkvöldi og nótt grunaðir um að vera undir áhrifum áfengis og/eða fíkniefna. Einn þeirra var einnig staðinn að ítrekuðum akstri sviptur ökuréttindum.

Í Árbæ var brotist inn í 9 geymslur í fjölbýlishúsi og ýmsum verðmætum stolið, þar á meðal dýru fjallahjóli.

Tveir ökumenn voru kærðir fyrir of hraðan akstur í Bústaðahverfi í nótt. Þeir óku á 124 km/klst og 123 km/klst þar sem leyfður hámarkshraði er 80 km/klst.