BYKO hefur dregið úr eigin losun gróðurhúsalofttegunda um 15% á árinu 2020 miðað við árið á undan eða um 19% frá því mælingar hófust.
Kolefnisbinding fyrirtækisins nemur um 1200 tonn á ári. Þetta kemur fram í sjálfbærniskýrslu BYKO fyrir rekstrarárið 2020. Eigin losun gróðurhúsalofttegunda á árinu 2020 nam 340 tonnum af CO2 og kolefnisbinding fyrirtækisins í skóglendi BYKO á Drumboddstöðum II nemur um 1200 tonn CO2 á ári. Sé kolefnislosun fyrirtækisins út frá eigin rekstri sett í samhengi við stöðugildafjölda þá er losun pr stöðugildi 1,0 tonn 2020 en var 1,14 tonn 2019 eða um 14% minnkun.
,,Við horfum þannig til hlutanna að leiðandi fyrirtæki sem BYKO er beri meiri ábyrgð. Við ákvarðanatöku þurfa slík fyrirtæki að hafa hæfileikann að horfa á stóru myndina í stað þröngs sjónarhorns. Klukkan tifar, við höfum einfaldlega ekki tíma til að bíða eftir því að hinn almenni borgari taki upp breytingar á eigin spýtur. Þar liggur vanmat hvað almenningur er tilbúinn til að sætta sig við þegar kemur aðgerðum leiðandi fyrirtækja og stjórnvalda,“ segir Sigurður B. Pálsson, forstjóri BYKO.
,,Að fyrirtæki setji það sem eiginlegt markmið að stefna á kolefnishlutleysi er varhugavert markmið, krafa um meiri árangur er staðar. Öll stöndum við í skuld við fortíðina. Að detta á markaðsvagninn er fyrir mörgum fyrirtækjum freistandi tilhugsun. Fyrirtæki eiga að setja áherslu á sjálfbærni og gera betur dag frá degi. BYKO leggur áherslu á sjálfbærni og umhverfismál í starfseminni og er ánægjulegt að sjá hvað markvissar aðgerðir eru að skila sér í minni losun koltvísýrings, þar má nefna orkuskiptin, sorpflokkun, fækkun flugferða starfsmanna o.s.frv.“ segir Sigurður ennfremur.
Á árinu 2020 fór BYKO í samstarf við Skógræktina til að kortleggja og meta bindinguna sem hefur átt sér stað í gegnum árin með viðurkenndum og vísindalegum hætti. Út frá þeirri vinnu var hægt að áætla heildarbindingu CO2 á árinu 2020 í samtals 1200 tonn.
