Segja má að nafnlausar hetjur hafi haldið uppi jólaandanum á Ísafirði þessi jól, eða svo má hið minnsta lesa úr skilaboðum sviðsstjóra velferðarsviðs Ísafjarðarbæjar sem birtist á heimasíðu bæjarins rétt í þessu.
Þar skrifar sviðsstjórinn Margrét Geirsdóttir:
Til ykkar sem viljið halda ykkur til hlés.
Velferðarsvið Ísafjarðarbæjar tók á móti gjafakortum frá ykkur að upphæð kr. 300.000,-. Gjafakortunum var skipt niður í lægri upphæðir. Það var því þó nokkur fjöldi fólks sem stendur illa fjárhagslega og/eða félagslega sem fékk óvæntan glaðning frá ykkur, ónefndum gefendum.
Margrét segir viðbrögðin við þessari óvæntu gjöf nafnlausu bjargvætta jólahátíðanna hafa verið ólýsanleg. „Margir segja að þetta bjargi jólunum og áramótunum hjá þeim.“
„Fyrir hönd velferðarsviðs Ísafjarðarbæjar vil ég þakka af alhug þá hlýju og þann mannkærleika sem lýsir sér með þessu framtaki ykkar,“ skrifar hún áfram. „Með innilegum hátíðarkveðjum og von um frið og velsæld á nýju ári,“ segir hún svo að lokum.
