Allir þættir Podcast með Sölva Tryggvasyni hafa verið gerðir aðgengilegir á ný. Það má því með sanni segja að Sölvi sé snúinn aftur á sjónarsviðið.

Þann 12. maí á þessu ári var öllum hlaðvarpsþáttum Sölva eytt af YouTube og af hlaðvarpsveitum. Var það gert í kjölfar fréttaflutnings um meint ofbeldi hans. Í kjölfar sögusagnanna um ofbeldið gaf Sölvi út hlaðvarpsþátt þar sem hann var viðmælandinn og vakti þátturinn töluverða athygli. Var það síðasti þáttur Sölva Tryggvasonar, í bili.

Nú geta aðdáendur hlaðvarpsþáttanna nálgast alla gömlu þættina í gegnum vefsíðuna solvitryggva.is en áskrift að efninu kostar 990 krónur á mánuði.

„Með því að gerast áskrifandi að Podcast með Sölva Tryggva færð þú aðgang að meira en 100 eldri þáttum, alls kyns aukaefni og 3-4 nýjum þáttum í hverjum mánuði. Um leið ert þú að hjálpa okkur að halda áfram þeirri vegferð að hafa áhrif á þjóðmálaumræðuna og geta boðið uppá innihaldsríkar og djúpar samræður með áhugaverðum einstaklingum í hverri viku. Auk þess verða dregnir út heppnir áskrifendur í hverjum mánuði sem fá veglega vinninga,“ segir í lýsingu um áskriftina á vefsíðunni.