Andrea Sigurðardóttir, blaðamaður hjá Viðskiptablaðinu, er vægast sagt komin með nóg af sóttvarnaraðgerðum, sérstaklega í ljósi frétta af því að þær verði mögulega hertar til muna á næstu dögum. Í dag greindi Vísir frá því að nýjasta minniblað Þórólfs innihaldi tillögur um 20 manna samkomubann. Fréttirnar hafa vægast sagt farið misjafnlega í marga en Andrea er ein af þeim sem er allt annað en sátt.
„20 manns? Nær allri tví- eða þríbólusettir, innlagnir ekki komist neins staðar nálægt því sem var síðasta vetur í stærstu bylgjum ársins. Frumgögn um ómíkrón sýna margfalt lægri innlagnatíðni. Við erum ekki öll í þessu saman, ég er að minnsta kosti alveg hætt. Þetta er fullkomlega óboðlegt,“ segir Andrea í færslu sem hún birti á Twitter-síðu sinni í dag.
Andrea gagnrýnir Þórólf Guðnason sóttvarnalækni þá harðlega fyrir tillögur sínar um hertari aðgerðir. „Sóttvarnalæknir lætur eins og bóluefni hafi enga þýðingu gagnvart ómíkrón en þær draga svo sannarlega úr veikindum, þótt þau komi ekki í veg fyrir smit. Það gerðu þau reyndar ekki heldur við fyrri afbrigðum. Við erum eingöngu á „núllpunkti” hvað varðar takmarkanir, ekki annað,“ segir hún.
Þá er hún á þeirri skoðun að með þessu áframhaldi muni faraldrinum, eða öllu heldur aðgerðunum við honum, aldrei ljúka. „Þetta mun aldrei hætta. Á næsta ári verður komið bóluefni við ómíkrón og þá verður væntanlega komið annað afbrigði sem fer fram hjá því, því þannig virka veirur. Þær bregðast alla jafna við auknu ónæmi með stökkbreytingum,“ segir hún.
„Því fyrr sem fólk er útsett því fyrr dregur úr skaðsemi faraldursins. Með því að tempra bylgjurnar líður lengra á milli endursýkinga sem dregur úr ónæmisminni þeirra sem fyrir eru sýktir og við verðum stöðugt á núllpunkti gagnvart veirunni.“
