Um klukkan 20 í gærkvöldi var maður í annarlegu ástandi handtekinn í Hlíðahverfi. Hann hafði hegðað sér ósæmilega og með hegðun sinni hneykslaði hann vegfarendur að því er segir í tilkynningu frá lögreglunni. Maðurinn var vistaður í fangageymslu.

Á tíunda tímanum í gærkvöldi rann mannlaus bifreið út af bifreiðastæði í Mosfellsbæ og valt niður grjótgarð.

Tilkynnt var um stuld á bíl í Breiðholti á fjórða tímanum í nótt.

Einn var handtekinn í Kópavogi á öðrum tímanum í nótt og vistaður í fangageymslu en hann var í annarlegu ástandi.

Einn ökumaður var handtekinn í gærkvöldi grunaður um að vera undir áhrifum fíkniefna. Auk þess reyndist hann vera sviptur ökuréttindum.