Markús Sigurbjörnsson fyrrverandi prófessor við Lagadeild Háskóla Íslands, hæstaréttardómari og forseti Hæstaréttar, verður útnefndur heiðursdoktor við lagadeild HÍ við athöfn sem fer fram í Hátíðasal HÍ kl.16.00 í dag.

Þetta kemur fram í fréttatilkynningu frá Háskólanum þar sem farið er yfir starfsferil Markúsar.

Markús var stundakennari og síðar prófessor í réttarfari frá 1988 til 1994. Markús átti afgerandi þátt í mótun og framkvæmd þeirra breytinga sem voru gerðar á íslenskri dómstólaskipan og réttarfari sem komust á um mitt ár 1992. Samdi hann fjölda frumvarpa til nýrra laga á sviði réttarfars sem hafa síðan verið undirstaða réttarfarslöggjafar í landinu.

Markús var skipaður hæstaréttardómari 1. júlí 1994 og gegndi því starfi allt þar til hann lét af störfum 30. september 2019 eða í rúmlega aldarfjórðung. Hann var varaforseti Hæstaréttar 2002 til 2003, forseti réttarins 2004 til 2005 og aftur um fimm ára skeið 2012 til 2016. Áhrif Markúsar Sigurbjörnssonar á starfsemi Hæstaréttar og íslenska lögfræði eru tvímælalaus. Frá því að Markús var skipaður hæstaréttardómari hefur hann gegnt starfi prófdómara við Lagadeild á nokkrum réttarsviðum en þó einkum á sviði réttarfars.

Í tilkynningunni kemur fram að það þyki einkar vel við hæfi að Markús verði heiðursdoktor í tengslum við 100 ára afmæli Hæstaréttar og 110 ára afmæli Háskóla Íslands.