Miskabætur sem eru hærri en gengur og gerist í almennri dómaframkvæmd gætu talist skattskyldar tekjur í skilningi íslenskra skattalaga. Þetta segir lögmaður og sérfræðingur í skattarétti í samtali við DV.
Mikið hefur verið rætt um fjárhæð miskabóta í máli Þórhildar Gyðu Arnarsdóttur og Jóhönnu Helgu Jensdóttur gegn Kolbeini Sigþórssyni í samfélaginu undanfarið og hafa spurningar sprottið upp, meðal annars á samfélagsmiðlum, um hvort greiðslur sem séu jafn úr takti við miskabætur ákvarðaðar af dómstólum og þær sem um ræðir, geti raunverulega talist miskabætur.
Í 28. grein laga um tekjuskatt eru miska- og skaðabætur teknar út fyrir sviga tekna í skilningi laga um tekjuskatt, þó með ákveðnum skilyrðum. Þrátt fyrir undanþáguákvæðið gætu miskabæturnar sem þær Þórhildur Gyða og Jóhanna Helga fengu greiddar árið 2018 vegna atviks árið 2017 á B5 í miðbæ Reykjavíkur, verið skattskyldar.
Fram hefur komið að Þórhildur og Jóhanna fengu hvor eina og hálfa milljónir vegna atviksins, auk þess sem Kolbeinn greiddi Stígamótum þrjár milljónir sem hluta af uppgjörinu.
Í samtali við DV segir sérfræðingur í skattarétti að hér þurfi að líta til fordæma og vísar hann einmitt til ákvörðun yfirskattanefndar og dóms Hæstaréttar er varðar uppgjörs fyrrum sambúðarhjóna.
Í fjárskiptasamningi sem gerður var við sambúðarslitin var fasteign skráð á konuna auk þess sem maðurinn greiddi konu sinni fjörutíu milljónir í reiðufé. Samkvæmt mati yfirskattanefndar voru þessar tvær færslur, skráning fasteignarinnar og peningagreiðslan, metnar sem gjafir. Kom fram að ekki hefði verið sýnt fram á „tekjur hennar á þeim tíma sem rennt gæti stoðum undir að hún hefði með beinum eða óbeinum framlögum skapað grundvöll fyrir hlutdeild í eignarrétti umræddrar fasteignar og peningagreiðslu.“ Matið var síðar staðfest í héraðsdómi og Hæstarétti.
Fyrir forvitna má finna dóminn hér.
Í stuttu máli voru tilfærslur fjármuna við skilnaðinn, umfram það sem eðlilegt gat talist í fjárskiptum fyrrum sambúðarhjóna, skattlagt sem gjöf.
Í tölvupósti sem Almar Möller, lögmaður Kolbeins, birti um nýliðna helgi kom fram að lögmaður Jóhönnu Helgu, sem sagði sína sögu í fréttum Stöðvar 2 á föstudagskvöldið, hafi átt frumkvæði að því að áætla miskabætur í málinu. Tölvupósturinn var svohljóðandi:
„Hún sagðist mögulega vera tilbúin að falla frá kærunni gegn greiðslu miskabóta, bað mig að skoða það og heyra í þér. Ég kíkti á dómafordæmi og fyrir brot gegn 209./217. hafa miskabæturnar verið í kringum 300 þús kall.
Að teknu tilliti til þess geri ég eftirfarandi tillögu:
Miskabætur: 300.000,-
Lögmannskostnaður: 109.120,- (útkall (54þús) + 2 tímar (17þús))
ALLS: 409.120
Er þetta eitthvað sem þið gætuð mögulega fallist á?“
Viðmælandi DV segir að í ljósi mats lögmanns konunnar á fjárhæð miskabóta og fyrrnefnds dóms Hæstaréttar, væri vel hægt að færa fyrir því rök að þeir fjármunir sem greiddir voru til Jóhönnu og Þórhildar umfram þá fjárhæð væri gjöf, og því um skattskyldar tekjur að ræða.
