Enzo Maresca, stjóri Chelsea, kvaðst ánægður hjá félaginu eftir að liðið tryggði sér sæti í undanúrslitum deildabikarsins með 3-1 sigri gegn Cardiff á útivelli á þriðjudagskvöld. Þetta sagði hann aðeins nokkrum dögum eftir að Ítalinn lýsti yfir mikilli óánægju með aðstæður á bak við tjöldin hjá félaginu.

Chelsea hafði áður unnið 2-0 sigur á Everton í deildinni, sem batt enda á fjögurra leikja hrinu án sigurs. Í kjölfarið sagði Maresca að hann hefði upplifað verstu 48 klukkustundirnar síðan hann tók við starfinu og kvartaði yfir skorti á stuðningi.

Eftir leikinn gegn Cardiff var þó allt annað andrúmsloft. Stuðningsmenn sungu nafn Maresca og hann fagnaði með þeim. Alejandro Garnacho skoraði tvö mörk og Pedro Neto eitt.

„Ég er bara ánægður. Við erum komnir í undanúrslit og það er það sem stuðningsmennirnir eiga skilið,“ sagði Maresca eftir leik. Hann vildi ekki fara nánar út í ummæli sín frá helginni og lagði áherslu á að hann hefði verið ánægður í starfi sínu frá fyrsta degi.

Chelsea er í fjórða sæti úrvalsdeildarinnar og mætir Newcastle á útivelli á laugardag.