Í síðustu viku lauk hinni svokölluðu Húsafellsdeilu með samkomulagi milli eigenda Húsafellsjarðarinnar og sveitarstjórrnar Borgarbyggðar. Deilan er flókin og varðar meðal annars ósamkomulag um deiliskipulag á svæðinu og rekstrarleyfi fyrir gistiheimilið Gamla bæ. Sá hluti deilunnar sem var mest áberandi í fjölmiðlum varðaði byggingu undir steinasafn myndhöggvarans Páls Guðmundssonar, sem reist hafði verið í óleyfi, en honum var gert samkvæmt dómi héraðsdóms að láta rífa. Eftir samkomulagið í síðustu viku liggur hins vegar fyrir að nágranni Páls, Sæmundur Ásgeirsson, ætlar ekki að fullnusta dóminn og steinasafnið verður ekki rifið.

Hluti af samkomulaginu var fimm milljóna króna greiðsla Borgarbyggðar til Sæmundur. Þá upphæð lætur hann hins vegar rennar til Björgunarsveitarinnar Brákar. Frá þessu segir í tilkynningu frá Björgunarsveitinni, þar sem farið er fögrum orðum um Sæmund:

„Það er ekki nóg með að öðlingurinn hann Sæmundur Ásgeirsson komi færandi hendi með matarmiklar súpur og ilmandi vöfflur þegar flugeldasalan okkar er í hámarki heldur ánafnaði hann Björgunarsveitinni Brák peningaupphæð sem honum var greidd í sl. viku vegna Húsafellsmálsins svokallaða. Það voru hvorki meira né minna en 5 milljónir og renna þær beint í húsbygginguna okkar. Þetta hefur ótrúlega mikið að segja þar sem það er meira en að segja það að byggja upp nýja björgunarmiðstöð. Við þökkum okkar velgjörðarmanni innilega fyrir.“