Ríkisstjórnin kemur saman á Hótel Valaskjálf á Egilsstöðum í dag kl. 16:00 til að ræða sóttvarnaaðgerðir á grundvelli minnisblaðs sóttvarnalæknis sem heilbrigðisráðherra hefur fengið afhent.
RÚV greinir frá þessu. Var þetta fyrirkomulag ákveðið vegna þess að ráðherrar eru margir á faraldsfæti enda Alþingi í sumarleyfi.
Svandísi Svavarsdóttur heilbrigðisráðherra barst minnisblað Þórólfs Guðnasonar sóttvarnalæknis í gær. Ekkert hefur verið upplýst um innihald þess en Þórólfur hefur þó látið hafa eftir sér í fjölmiðlum að aðgerðirnar verði ekki eins harkalegar og þær takmarkanir sem gripið var til fyrir daga bólusetninga gegn Covid-19 hér á landi.
Fullvíst er þó talið að stórum útihátíðum verði aflýst enda mætti búast við yfir 15.000 manns á Þjóðhátíð í Eyjum að óbreyttu.
