Einkaþjálfarinn Ólöf Tara Harðardóttir er ein þeirra 5 einstaklinga sem fengið hefur kröfubréf frá lögmanninum Vilhjálmi Vilhjálmssyni vegna ummæla sinna um tónlistarmanninn Ingólf Þórarinsson, eða Ingó Veðurguð eins og hann er gjarnan kallaður. Hinir einstaklingarnir eru Erla Dóra Magnúsdóttir, blaðamaður á DV, Kristlín Dís Ingilínardóttir, blaðamaður á Fréttablaðinu, Edda Falak áhrifavaldur og Sindri Þór Hilmars- Sigríðarson, markaðsstjóri hjá Tjarnarbíó og aktívisti.
Ólöf greindi frá því í færslu á Twitter-síðu sinni í gær að bréfið væri komið til hennar og birti um leið mynd af kröfubréfinu.
„Mín afsökunarbeiðni til þín. Mín eina eftirsjá er að syngja og tralla við þessa drepleiðinlegu tónlist þína. Kærðu það sorpið þitt,“ segir Ólöf í færslunni. Í bréfinu kemur fram að Ingó krefjist þess að fá greiddar 2 milljónir á næstu 5 dögum, auk þess sem hann vill fá afsökunarbeiðni frá Ólöfu vegna ummæla hennar. „Er ÍBV svona hræddir að við að kynna til leiks mann sem nauðgar?“ eru ummælin sem Ingó vill að Ólöf fjarlægji og biðjist afsökunar á. Ólöf hefur frest til 19. júlí næstkomandi til að verða við kröfum tónlistarmannsins.
Hér fyrir neðan má sjá hvað stendur í bréfinu:
„Til mín hefur leitað Ingólfur Þórarinsson og falið mér að gæta hagsmuna sinna vegna ærumeiðandi ummæla sem þú viðhafðir um hann á Facebook og Twitter 28. júní 2021.
Eftirfarandi ummæli eru ærumeiðandi aðdróttanir og varða við 235. gr. almennra hegningarlaga nr. 19/1940:
Er ÍBV svona hræddir að við að kynna til leiks mann sem nauðgar?
Þess er krafist að þú biðjir umbjóðanda minn afsöknar skriflega og birtir afsökunarbeiðnina á Twitter og Facebook. Jafnframt er þess krafist að þú fjarlægir ummælin. Þá er þess krafist að þú greiðir umbjóðanda mínum krónur 2.000.000,- í miskabætur auk lögmannskostnaðar að fjárhæð krónur 250.000,- að meðtöldum virðisaukaskatti.
Veittur er frestur til 19. júlí nk. til þess að verða við ofangreindum kröfum, en að þeim tíma liðnum er áskilinn réttur til málshöfðunnar án frekari viðvörunar.“
Mynd af kröfubréfinu má svo sjá hér fyrir neðan:
