Eigendum íþróttavöruverslunarinnar Sportland hefur verið gert að greiða Ra 5 ehf., dótturfélagi fasteignafélagsins Regins, rúmar 9 milljónir króna í vangoldna leigu auk dráttarvaxta vegna verslunarhúsnæðis við Garðatorg í Garðabæ. Dómus þess efnis féll í Héraðsdómi Reykjaness í vikunni. Eigendur félagsins eru Pétur Örn Bjarnason og Einar Páll Tamimi.
Verlunin Sportland er flestum Garðbæingum góðkunn enda er fyrirtækið með samning við Stjörnuna um sölu á íþróttaklæðnaði fyrir iðkendur félagsins. Rekstrarfélag verslunarinnar, SL1 ehf, húsnæði við Garðatorg 4c af Klasa ehf. frá 1. september 2015 en dótturfélag Regins, Ra 5 ehf., eignaðist fasteignina á leigutímanum. Í dómnum kemur fram að húsaleigan hafi verið 375 þúsund krónur á mánuði en sú fjárhæð hækkaði síðan í takt við vísitölu.
Í dómsorði kemur fram að vegna vangoldinnar leigu hafi forsvarsmenn Ra 5ehf. sagt upp leigusamningum í nóvember 2019 og síðan hafi útburður verið samþykktur í febrúar 2020. Húsnæðið hafi svo verið rýmt í maí í fyrra en verslunin flutti þá í nýtt húsnæði í verslunarkjarna við Garðaflöt 16-18 í Garðabæ.
Eigendur Sportlands gripu til varna í héraði og héldu meðal annars fram aðildarskorti Ra 5 ehf. að leigusamningum sem var ekki fallist á.
Þá kröfuðust eigendur Sportlands að þeir ættu rétt á afslætti sem næmi 20% af leiguverðinu á grundvelli þess að verslunarrýmið væri sagt 174,5 fermetrar í leigusamningi en væri aðeins 139,6 fermetrar samkvæmt Fasteignaskrá eins og þinglýsingarstjóri vakti athygli á þegar leigusamningnum var þinglýst. Það hefði takmarkað vöruframboð Sportlands í versluninni og þar með sölu og tekjur. Væri sú afsláttarkrafa hærri en sem næmi vangoldinni leigu.
Þá var því haldið fram, að samningssambandinu hafi lokið með saknæmum og ólögmætum hætti og forsvarsmenn Ra 5 ehf. hafi hrakið eigendur Sportland úr húsnæðinu á grundvelli riftunaryfirlýsingar sem fól í sér brot á leigusamningum.
Verslunin hefði þurft að loka tímabundið á meðan leitað var að öðru húsnæði og orðspor Sportlands borið hnekki. Þá hafi viðskiptasambandið mikilvæga við Stjörnuna og iðkendur félagsins einnig skaðast.
Á þessi sjónarmið féllst héraðsdómur ekki og var því forsvarsmönnum Sportlands gert að greiða Ra 5 ehf. rúmar 9 milljónir króna auk dráttarvaxta auk 434 þúsund króna í málskostnað.
