Tveir hælisleitendur sem vísa átti úr landi voru í dag handteknir á skrifstofu Útlendingastofnunar. Þetta kemur fram í tilkynningu Refugees in Iceland sem félagið birtir á Facebook. Þar segir að mennirnir hafi komið á skrifstofurnar í góðri trú um að fá þar bólusetningarvottorðin sín og segir að þeim hafi verið sagt að þeir mættu nálgast vottorðin þar. Þegar þeir voru þangað komnir hafi hins vegar lögreglan verið kölluð til sem mættu á sex lögreglubílum og mennirnir verið handteknir.

Félagsskapurinn fullyrðir jafnframt að mennirnir hafi verið beittir ofbeldi.

Tilkynninguna má sjá í heilu lagi hér að neðan.

Ekki náðist í Útlendingastofnun við vinnslu fréttarinnar og engin tilkynning frá lögreglu hefur borist fjölmiðlum vegna málsins.