Skiptum er lokið í félaginu GK-ACR ehf. en félagið var úrskurðað gjaldþrota þann 14. febrúar 2019. Alls voru lýstar kröfur tæpar 827 milljónir krónar. Þetta kemur fram í Lögbirtingablaðinu í dag. Viðskiptablaðið greindi fyrst frá.
Þegar rekstur var í félaginu hét það Auto Car Rental ehf og var það meðal annars á bak við rekstur á samnefndri bílaleigu. Félagið var stofnað árið 2013 en rekstur hófst 2014. Félagið skilaði tapi öll rekstrarár sín.
Samkvæmt síðasta ársreikningi ársins 2016 var skráður eigandi þess Vignir Óskarsson í gegnum félagið Eignarhaldsfélagið Gráklett ehf.
Vignir er meðal annars eigandi Orange Car Rental og leigufélagsins Fasteignageirans. Þá á hann einnig 20% hlut í Voot sem samkvæmt heimasíðu fyrirtækisins veitir alhliða þjónustu fyrir sjávarútveginn.
