Yfirlýsing um 130 kvenna sem mótmæla þeirri ákvörðun þjóðhátíðarnefndar Vestmannaeyjar að fá Ingólf Þórarinsson tónlistarmann – Ingó Veðurguð –  til að stýra brekkusöng á Þjóðhátíð í Eyjum síðar í sumar hefur vakið blendin viðbrögð. Í ummælakerfum fjölmiðla ber mikið á gagnrýni á framgöngu hópsins og sumir saka konurnar um að vega að mannorði tónlistarmannsins í krafti ósannaðra sögusagna en Ingólfur hefur ekki verið kærður fyrir kynferðisbrot eða annað ofbeldi.

Fjallað var um yfirlýsingu hópsins í öllum fjölmiðlum fyrir helgi. Meðal þeirra sem blanda sér í umræðuna er Guðfinna Jóhanna Guðmundsdóttir, fyrrverandi borgarfulltrúi Framsóknarflokksins og núverandi lögmaður. Þess má geta að það vakti mikla athygli er Guðfinna steig fram í vor og greindi frá skelfilegu kynferðisofbeldi sem hún varð fyrir í æsku.

Guðfinna deilir frétt RÚV um mál Ingólfs og gerir athugasemd við að hann sé kallaður „meintur“ kynferðisbrotamaður í fréttinni. Er þó um að ræða beina tilvitnun í yfirlýsingu hópsins. Guðfinna segir:

„Hvað er að vera “meintur” kynferðisbrotamaður á Íslandi í dag? Hefur hann verið ákærður fyrir kynferðisbrot?“

„Ég er bara forvitin hvort þessi maður hafi verið àkærður því skilja mà fréttina þannig.“

Í umræðum undir færslu Guðfinnu ber mikið á þeirri skoðun að meintur gerandi sé aðeins sá sem hefur verið ákærður fyrir afbrot. Ingólfur hefur hvorki verið kærður né ákærður.

Í dag birti hópurinn „Öfgar“ 20 nafnlausar reynslusögur þar sem Ingólfur er sakaður um áreitni og kynferðisbrot. Í viðtali við Vísir.is um málið segir Ingólfur að ekkert sé til í þessum sögum. „Maður er orðinn ringlaður. Ég veit hver ég er og hvað ég hef gert og ég held að það sem er satt eigi eftir að koma í ljós.“

Hann segist enn fremur munu leita réttar síns vegna áburðarins á hann. „Þetta er farið að hafa áhrif atvinnulega og aðallega er þetta leiðinlegt fyrir fólkið sem þekkir mann, að þurfa að standa í þessu. Þetta er orðið svo gróft núna.“ Segist Ingólfur hafa mestar áhyggjur af sínum nánustu í tengslum við þessa umræðu.