Kona nokkur rak upp stór augu í verslun í Njarðvík í gær er hún taldi sig sjá Daða Freyr Pétursson og Huldu Kristíni Kolbrúnardóttur, keppendur Íslands í Eurovision, þar sem hópurinn var nýkominn til landsins og ætti því að vera í einangrun þar til niðurstöður lægju fyrir úr sýnatöku vegna COVID-19.

Hún vakti athygli á málinu á Facebook. „Ánægð eins og ég er með árangur Daða og Gagnamagsnins í Eurovision í gær, þá er ég vægast sagt vonsvikin yfir þeirri ákörðun þeirra að koma við í Krónunni í Njarðvík beint eftir komuna til Íslands fyrr í dag þar sem meðlimur hópsins stóð fyrir framan manninn minn (sem er óbólusettur) í röðinni á kassann“

Gísli Marteinn Baldursson var þó fljótur að skrifa athugasemd við færsluna og benda á að ekkert sé hæft í þeim ásökunum.

„Hér held ég að hljóti að vera einhver misskilningurá ferðinni. Við lentum í Keflavík síðdegis í gær og eftir sýnatöku í Leifsstöð fórum við beint upp í rútu sem ók okkur rakleiðis á sóttvarnarhótelið á Höfðatorgi í Reykjavík. Við komum hvergi við á leiðinni, og rútan kom hvergi nálægt Krónunni í Njarðvík. Ég hefði haldið að hvert mannsbarn þekkti Daða og Huldu núorðið en þú ert greinilega að fara mannavillt eða með einhverjum öðrum hætti að hafa Huldu og Daða fyrir rangri sök því miður. Sem er leiðinlegt því engan hóp þekki ég sem er jafn einlægur og sannur í því að hafa rétt við og er jafn langt frá þvi´að telja sig hafinn yfir reglur eins og þessir flottu krakkar í Gagnamagninu“

Í kjölfarið uppfræði konan færslu sína og baðst afsökunar.

„Ætlunin mín var síður en svo að bera rangar sakir á þennan glæsilega hóp sem við fjölskyldan dáðumst að kvöldið áður enda dyggir aðdáendur Daða og Gagnamagsnins. Mér þykir þetta mjög miður og bið hópinn innilegrar afsökunar á því að hafa farið svona rækilega mannavilt og talið þennan hávaxna mann með axlasíða hárið og stúlkuna við hlið hans með bláa hárið og húfuna vera meðlimi Gagnamagsnins […] við erum víst ekki eins mannglögg og við töldum okkur vera.“