Um klukkan 18 í gær var ekið á bifreið í Hlíðahverfi. Þegar tjónþoli sagði tjónvaldi, sem er kona, að hringt yrði í lögregluna settist konan aftur inn i bifreið sína og ók aftur á bifreið tjónþola. Því næst steig hún út úr bifreið sinni og gekk á brott. Hún var þá beðin um að halda kyrru fyrir og gerði hún það og settist og beið þar til lögreglan kom á vettvang. Konan var handtekin og vistuð í fangageymslu en hún er grunuð um ölvun við akstur.

Á níunda tímanum í gærkvöldi varð umferðaróhapp í Laugardalshverfi. Tjónvaldur hljóp á brott frá vettvangi. Lögreglan telur sig vita hver hann er. Báðar bifreiðarnar voru óökufærar og voru fluttar á brott með kranabifreið.

Klukkan 18 var tilkynnt um slys þar sem kona hafði dottið við fjallstopp Helgafells. Sjúkraflutningamenn aðstoðuðu hana niður og fluttu á Bráðadeild en hún var köld og með verki.

Í Kópavogi komu menn akandi að húsi einu upp úr miðnætti og köstuðu grjóti í gegnum rúðu. Upptaka af þessu náðist á öryggismyndavél.

Brotist var inn í geymslu fjölbýlishúss í Árbæ seinnipartinn í gær og reiðhjólum og fleiru stolið.

Í Bústaðahverfi var maður handtekinn um klukkan 20 en hann hafði brotið rúðu í húsi og farið inn. Hann var í annarlegu ástandi og var vistaður í fangageymslu.

Þrír ökumenn voru handteknir grunaðir um að vera undir áhrifum áfengis og/eða fíkniefna.