Maður sem grunaður er um stórfelld skemmdarverk á bíl Svölu Lindar Ægisdóttur og fyrir að hafa margbrotið nálgunarbann gegn henni og fjölskyldu hennar hefur verið látinn laus úr haldi lögreglu, samkvæmt heimildum DV. Maðurinn var handtekinn í gærkvöld eftir mikla leit.
DV bar tíðindin undir Svölu Lind sem segir: „Þetta er hræðileg staða. Ég veit ekkert og skil ekki að hann sé laus. Það er ekki að fara að auka öryggi okkar neitt að hann hafi verið handtekinn og yfirheyrður ef hann gengur laus núna.“
Málið hófst í nóvember í fyrra, að sögn Svölu, er maðurinn nam son hennar á brott, frelsissvipti hann og misþyrmdi honum hrottalega. Tilefni árásarinnar var afbrýðisemi.
Svala fékk úrskurðað nálgunarbann á manninn. Að hennar sögn hefur hann þverbrotið nálgunarbannið, meðal annars með líflátshótunum og skemmdarverkum. Hún hefur hljóðritanir af hótunum mannsins í síma. Á grundvelli þess hefur hún farið fram á að maðurinn verði dæmdur í síbrotagæslu en ekki hefur orðið af því enn.
Í ljósi þeirra frétta að maðurinn sé laus úr haldi er ljóst að Svala og fjölskylda hennar eru ekkert frekar óhult fyrir manninum í dag en þau voru í gær.
Í frétt á vef lögreglunnar segir að gæsluvarðhaldskröfu á hendur manninum hafi verið hafnað af héraðsdómi. Orðrétt segir:
„Kröfu Lögreglunnar á höfuðborgarsvæðinu um gæsluvarðhald yfir karlmanni á þrítugsaldri var hafnað í Héraðsdómi Reykjavíkur í dag, en krafan var lögð fram í þágu rannsóknar lögreglu er varðar m.a. meint brot mannsins gegn nálgunarbanni.
Lögreglan á höfuðborgarsvæðinu hefur kært úrskurð héraðsdóms til Landsréttar.“
