Þann fyrsta nóvember árið 2019 hófst löng fréttasaga á dv.is undir fyrirsögninni „Guðrún leitar að manninum sínum svo hún geti skilið við hann“.

Þar ræddi Guðrún Benediktsdóttir, miðaldra kona úr Breiðholti, við DV og sagði farir sínar ekki sléttar af samskiptum við Aras Nasradeen Kak Abdullah, ríflega þrítugan Kúrda frá Írak. Guðrún og Aras höfðu kynnst á Facebook og orðið vel til vina í skilaboðaspjalli. Svo fór að Aras kom til Íslands og þau giftust.

Guðrún bar Aras illa hjónabandssöguna. Sagði hann hafa sóað fé sínu og verið sér ótrúr. Þegar þarna var komið við sögu var Aras fluttur út frá henni fyrir löngu og hún vissi ekki hvar hann hélt sig, taldi hann þó vera í tygjum við aðra konu. Sagðist Guðrún um þetta leyti ekki hafa séð Aras í eitt ár.

Guðrún gerði kröfu um skilnað en hún sagði Aras neita sér um hann þar sem hjónabandið væri forsenda þess að hann héldi dvalarleyfi hér á landi. DV hefur birt margar fréttir um mál þeirra en síðastliðið sumar hafnaði héraðsdómur kröfu Guðrúnar og hún var því neydd áfram til að vera gift manni sem hún hittir aldrei og vill ekkert með hafa.

Í dag tilkynnti Guðrún síðan á Facebook-síðu sinni, og staðfesti í spjalli við DV, að hún væri loks búin að fá skilnað. Aras skrifaði loks undir skilnaðarpappíra hjá sýslumanni og skyndilega er skilnaðurinn orðinn að veruleika. Guðrún getur horft til framtíðarinnar án þess að leiða hugann að þessum manni sem hún segir hafa leikið sig grátt. Aðalatriðið er þó að þau vilja hvorugt nokkuð með annað hafa og halda hvort sína leið.

Þetta er gleðidagur í lífi Guðrúnar sem horfir nú björtum augum til framtíðarinnar, í fyrsta skipti í langan tíma.