Tvær konur og einn karlmaður hafa verið ákærð fyrir innflutning á metamfetamíni til Íslands. Konurnar eru spænskir ríksiborgarar og var kveðinn upp dómur yfir annarri þeirra í Héraðsdómi Reykjaness í gær.

Konan var ákærð fyrir að hafa í félagi við aðra staðið að innflutningi á samtals 255,84 g af metamfetamíni sem ætlað var til söludreifingar hér á landi í ágóðaskyni. Flutti hún fíkniefnin hingað til lands í farþegaflugi frá Kaupmannahöfn. Faldi hún efnin innvortis og í dömubindi í nærfatnaði.

Konan játaði brot sitt skýlaus en hún hefur ekki sætt refsingu hér á landi áður. Var hún dæmd í sex mánaða fangelsi en til frádráttar refsingunni kemur gæsluvarðhald sem hún sat í frá 21. desember 2020 til 1. mars 2021. Fíkniefnin eru gerð upptæk. Hún þarf jafnframt að greiða málskostnað upp á um 800 þúsund krónur.