Bókun var lögð fram á síðasta fundi bæjarstjórnar Reykjanesbæ um flýtingu á bólusetningu flugliða og annars starfsfólks flugfélaga sem á í samskiptum við flugfarþega og skorar á stjórnvöld að breyta forgangsröðun bólusetningar til þess að svo megi verða.

Þetta kemur fram í tilkynningu frá bæjarstjórninni sem send var á fjölmiðla. Bent er á að 40% efnahagsumsvifa á svæðinu má beint eða óbeint rekja til Keflavíkurflugvallar.

„Til að auka líkur á skjótari viðsnúningi ferðaþjónustunnar og starfseminnar á Keflavíkurflugvelli er mikilvægt að gera allt sem hægt er til að draga úr neikvæðum áhrifum Covid-19. Stór liður í því er að flýta bólusetningu framlínufólks í flugi og flugþjónustu svo það sé betur búið undir að taka á móti og þjónusta fólk sem vill ferðast til Íslands í vor og sumar,“ segir í tilkynningunni en bæjarstjórnin segir að atvinnuleysi á Suðurnesjum er það langmesta á Íslandi og mikilvægt að koma hjólum atvinnulífsins í gang að nýju.

Allir meðlimir bæjarstjórnar skrifa undir bókuninan nema Gunnar Þórarinsson, fulltrúi Frjáls Afls. Ekki kemur fram hvers vegna hann skrifar ekki undir. Hann var viðstaddur fundinn samkvæmt fundargerð.

„Samkvæmt nýjum könnunum kemur fram að val á áfangastað mun fyrst og fremst ákvarðast af því hvernig landið tekur á Covid-19 og bólusetningu gagnvart ferðamönnum. Þá leið eru m.a. Írar að fara til þess að geta markaðsett sinn flugvöll sem veirufrían flugvöll,“ kemur fram í tilkynningunni og því skiptir bólusetning framlínufólks í ferðaþjónustu miklu máli en ekki síður til þess að koma í veg fyrir að smit berist til landsins.