Vegagerðin varar við miklum umferðartöfum á Vesturlandsvegi um Kjalarnes í dag. Vegagerðin hafði áður sagt að tafir yrðu á umferð og virðist sú hvimleita spá hafa ræst í dag. Mikil og þung umferð var í bæinn í gær eftir fyrstu helgina í júlí, sem er ein mesta ferðahelgi ársins.
Umferð á þjóðvegi 1 á Kjalarnesi er nú handstýrt og geta liðið 20 mínútur á milli þess að skipt er um stefnu. Hægt er að komast hjá þessum töfum með því að aka Mosfellsheiði, Kjósaskarð og Hvalfjarðarveginn. Sú leið er um 40 km lengri en Kjalarnesleiðin og talsvert seinfarnari.
Að sögn Vegagerðarinnar er gert ráð fyrir að vinna standi til 23:00 í kvöld og hefjist aftur á morgun, þriðjudag kl. 8:30 og standi til 23:00.
Tilkynning Vegagerðarinnar í heild sinni:
Miklar umferðartafir eru á Kjalarnesi vegna malbikunarframkvæmda og umferð er handstýrt og geta liðið ca 20 mín á milli þess að skipt er um stefnu. Vegfarendum er bent á hjáleið um Mosfellsheiði, Kjósaskarð og Hvalfjörð. ATH. Hin akreinin verður malbikuð á morgun þriðjudaginn 7. Júlí og má þá einnig reikna með töfum.
