Veðurstofan varar við óveðri á miðhálendinu seinni part miðvikudags og fram á fimmtudagasmorgun. Er gul viðvörun í gildi frá klukkan 19:00 miðvikudagsins 15. júlí og til 03:00 aðfaranótt fimmtudags. „Vindstyrkur getur náð allt að 25 m/s í hviðum, en slíkt er varasamt fyrir göngufólk og þá sem hafast við í tjöldum,“ segir Veðurstofan í viðvörun sinni.
Veðurstofan spáir ennfremur úrhellis rigningu svo til um allt land. Má því búast við blautu malbiki í borginni í kvöld og svo aftur frá miðvikudagseftirmiðdegi og fram á fimmtudag.
Hiti um 5-10 gráður um allt land.
Það er því kominn tími til að dusta rykið af grillábreiðunni, loka fyrir gaskútinn og kippa pullunum inn. Af spánni að dæma virðist borgin þó sleppa við rokið á hálendinu, en íslenska lognið gæti hreyfst eitthvað hraðar austan og suðaustan til.
Spáir veðurstofan suðaustan blautvirði og allt að 18 m/s vindi við Öræfajökul á fimmtudagskvöld. Ef einhver trampólín eru eftir á svæðinu eftir óveður síðasta veturs væri ráð að binda þau niður.
