Kristján Gunnar Valdimarsson, lögmaður og lektor við Háskóla Íslands, er skráður verjandi sakbornings í dómsmáli sem fyrirtaka verður í við Héraðsdóm Reykjavíkur þann 21. apríl. Um er að ræða mál þar sem aðili er sakaður meiriháttar brot gegn skatta- og bókhaldslögum, og peningaþvætti.

Þann 18. desember greindi DV frá því að Kristján Gunnar héldi oft partý á heimili sínu við Aragötu þar sem væru unglingar og ungmenni meðal gesta og fíkniefna væri neytt. Kom meðal annars fram í fréttinni að ung stúlka hefði verið flutt með sjúkrabíl frá heimili hans vegna ofneyslu fíkniefna.

Á jóladag 2019 var Kristján síðan handtekinn, sakaður um kynferðisbrot. Ekki var hins vegar krafist gæsluvarðhalds yfir honum og því síður var hann ákærður vegna þeirra ásakana. Sjá einnig: Kristján Gunnar handtekinn á jóladag og færður í einangrun

Eftirgrennslanir DV leiddu í ljós að Kristján Gunnar hélt lektorsstöðu sinni við HÍ eftir að þessi hneykslismál komu upp. Hins vegar hafði hann verið tekinn úr kennslu fyrr um haustið vegna óreglu.

Áreiðanlegar heimildir herma einnig að Kristján Gunnar hafi haldið til Bandaríkjanna um áramótin og gengist undir fíknimeðferð. Óvíst er hve lengi sú meðferð varaði.

Ekki náðist samband við Kristján Gunnar við vinnslu fréttarinnar en í talhólfi sínu vísar hann á netfang sitt hjá lögmannastofunni Cato. Kristján er hins vegar ekki starfandi þar lengur og samkvæmt upplýsingum frá Cato hafa aðrir lögmenn á stofunni ekki tekið yfir verkefni hans.

Héraðssaksóknari í dómsmálinu sem hér um ræðir hefur staðfest að engar breytingar hafi verið gerðar á dagskránni og Kristján er því enn verjandi í málinu. Var hann skipaður í það hlutverk við þingfestingu málsins í desember síðastliðnum.